Redaktori i “RTV Ora”, gazetari Trashgim Sokolaj, i ftuar në emisionin “360 Gradë”, komentoi vrasjen e dyfishtë në Shkodër, ku humbën jetën vëllezërit Astrit dhe Brahim Bilali.
Ai tha se vrasjet kanë qenë të planifikuara deri në detaje, dhe se pas kësaj, fshihet një grupi i strukturuar kriminal. Po kështu gazetari u ndal më tej tek armët dhe tek makina që u përdor kur u ekzekutuan dy vëllezërit, duke e vlerësuar se autorët e kanë menduar deri në detajet e fundit.
“Është një ngjarje e planifikuar në detaje. Tregon se pas saj ka një grup shumë të fuqishëm kriminal. Janë përdorur dy armë kallashnikov, që sipas ekspertëve që flasin, futen tek armët më të fuqishme.
Është përdorur një makinë e vjedhur me targa të falsifikuara. Makina rezulton që të jetë vjedhur në dy-tre muajt e fundit, dhe në janar të këtij viti është bërë denoncimi zyrtar. Është vjedhur në Shkodër, është përdorur me targa të falsifikuara për t’i shpëtuar pikasjes së policisë që patrullojnë herë pas here. Është një krim perfekt”.
