Kryeminsitri Edi Rama, ndodhet për një vizitë zyrtare në Maqedoninë e Veriut, me ftesë të homologut të tij, Zoran Zaev. Në Shkup, dy krerëve të qeverive respektive, i është bashkuar edhe Presidenti i Serbisë, në kuadër të Forumit Ekonomik për Bashkëpunimin Rajonal.
Tre liderët e Ballkanit Perëndimor do të nënshkruajnë nesër dy memorandume dhe një marrëveshje ndërshtetërore që ka për qëllim lehtësimin e lëvizjes së njerëzve dhe thjeshtimin e formaliteteve lidhur me importin, eksportin dhe lëvizjen mallrave, bashkëpunimin mes doganave dhe autoriteteve të tjera kompetente.
I dërguari i Top Channel në Shkup, Muhamed Veliu raporton se forumi që do të mbahet nesër është ndarë në tre pjesë. Fjala e 3 lidërve, diskutime me karakter ekonomik dhe ceremonia nënshkrimit të tre marrëveshjeve të reja.
Sipas tij, Zoran Zaev, Aleksandër Vuçiç dhe Edi Rama do të paraqesin edhe një vizion politik e ekonomik për një rajon të integruar. Forumi Ekonomik për Bashkëpunim Rajonal në Ballkanin Perëndimor do të përfshijë më shumë se 300 kompani nga Maqedonia e Veriut, Serbia, Shqipëria, dhe BeH, si dhe biznese tjera rajonale.
