Zyra e qeverisë së Kosovës, ka konfirmuar se Kryeministri Albin Kurti nuk do të jetë nesër i pranishëm në Samitin e Shkupit, ku do të takohen liderët e Ballkanit Perëndimor, kryeministri shqiptar Edi Rama, homologu maqedonas Zoran Zaev, dhe presidenti serb Aleksandër Vuçiç.
Në një përgjigje për Euronews, zyra e kryeministrit tha se qëndrimet e tyre janë të qarta dhe iniciativa e quajtur “Mini-shengen” nuk e ka miratimin e tyre.
“Qëndrimet tona për idenë e Novi Sadit, të ashtuquajtur ‘Minishengen’, tashmë janë të njohura. Kjo iniciativë nuk e ka miratimin tonë”, thuhej në përgjigje.
Sipas raportimeve nga Shkupi, tre liderët e Ballkanit Perëndimor do të nënshkruajnë nesër dy memorandume dhe një marrëveshje ndërshtetërore që ka për qëllim lehtësimin e lëvizjes së njerëzve dhe thjeshtimin e formaliteteve lidhur me importin, eksportin dhe lëvizjen mallrave, bashkëpunimin mes doganave dhe autoriteteve të tjera kompetente.