Marrëveshja e firmosur më 14 gusht mes qeverisë shqiptare dhe asaj italiane, për njohjen e lejeve të drejtimit, duket se ka dështuar.
Sipas kësaj marrëveshjeje, pritej që vendimi të hynte në fuqi duke filluar nga 8 shtatori, dhe do mundësohej vetëm për ata të cilët janë pajisur me modelin e ri të lejeve të drejtimit, të lëshuara nga janari i vitit 2017. Shtetasit të cilët e kanë marrë patentën e re, shprehen se ata ndeshen me problematika të shumta.
Përfituesit janë të paktë në numër, pasi në memorandumin e caktuar u jepet e drejta vetëm atyre që janë rezident 3 vitet e fundit dhe që janë të pajisur me kontratë. Por ajo që penalizon shqiptarët është fakti se Italia prej më shumë se pesë vitesh është në një krizë të madhe në tregun e punës dhe në këto kushte punëtorët janë pa kontrata të rregullta.
Sipas të dhënave, rreth 500 mijë shqiptarë në Itali janë të pajisur me patenta të para viteve 2015, duke i përjashtuar ata automatikisht nga kjo marrëveshje. Nga ana tjetër, njohja e lejes së drejtimit me Italinë shoqërohet edhe me një kosto financiare shtesë që shkon mbi 500 euro.
Kostoja rritet ndjeshëm për ata që kanë leje të vjetra të drejtimit, pra të lëshuara para vitit 2017.
Memorandumi i publikuar nga ministria e transportit në Itali e bën nul dokumentin e dalë nga takimi i 14 gushtit. Duket se të njëjtin fat do të kenë edhe drejtuesit e automjeteve shqiptare që punojnë në Greqi, vend më të cilin është firmosur e njëjta marrëveshje.
