Të dhëna të reja të vijim të dosjes së kryetarit të Bashkisë Gramsh, Klodian Taçe, kanë dalë në dritë, lidhur me akuzat për vjedhje në vitin 2009. ‘Dosja.al’ ka bërë publik pjesën e fundit të materialit hetimor të vitit 2009, kur Klodian Taçe u përball me akuzën e një recepsionisteje e cila e akuzoi atë për vjedhjen e 68 mijë lekëve të reja. Taçe ka qenë nën hetim dhe këtë fakt e ka shmangur kur garoi për kryetar Bashkie.
Klodian Tace, i zgjedhuri i Partisë Socialiste në Gramsh, ka fshehur në formularin e dekriminalizimit; hetimin për vjedhje nga Prokuroria e Tiranës në vitin 2009. Ai rezulton i pafajshëm për akuzën në fjalë. Megjithatë ka qenë nën hetim, por këtë fakt e ka fshehur në formularin e dekriminalizimit.
Asokohe, kur Prokuroria e Tiranës regjistroi procedimin penal, u morën në pyetje të gjithë personazhet dhe dëshmitarët e vjedhjes. Dy prej tyre, mjeku i qendrës, Preng M., dhe kolegu i Taçes, Sokol V., u rreshtuan krah kryebashkiakut duke akuzuar direkt për vjedhjen recepsionisten, se ishte ajo që përvetësoi paratë. Ngjarja është shënuar më 27 shkurt 2009, ku shtetasja Ledina D., ka kallëzuar në Prokurori se rreth orës 16:00, në qendrën shëndetësore ku ajo punonte si recepsioniste, kanë shkuar dy teknikë kompjuterash, Sokol V., dhe Klodian Taçe, që tashmë është kryetar Bashkie në Gramsh.
Rrëfimi i Sokol V., kolegu i Klodian Taçes:
Pyetje: Ju zoti Sokol, a keni shkuar tek Arka ku ndodheshin paratë?
Përgjigje: Pyetjen e kuptova dhe dua të them se unë nuk kam shkuar te arka, se nuk pata punë atje por vetëm në laborator.
Pyetje: Ku e mësuat se ishin marrë lekët e xhiros në sirtar?
Përgjigje: Dua të them se unë kisha punën time dhe tek arka nuk kam shkuar. Atje ka shkuar shoku im Klodiani bashkë me punonjësen dhe aty mësova se Ledina i tha Klodianit për lekët që mungonin. Por më pas Klodiani i tha që unë nuk iki pa u sqaruar këtë punë dhe të njoftojmë edhe doktorin. Pasi ne punuam akoma në laborator. Më pas po e njëjta Ledina i tha Klodianit: Të më falësh që të akuzova sepse ishte më instiktive, nuk e mendova mirë që të akuzova. Aty ishin dhe dy laborante të tjera. Më pas mbaruam punë dhe u larguam por në darkë më merr Klodiani në telefon dhe më thotë që të shkojmë tek Komisariati në Kamëz, se na ka akuzuar dhe konkretisht Klodianin.
Rrëfimi i mjekut Preng M., punonjës tek qendra private ku u vodhën paratë
Unë jam konsulent i kësaj qendre që nga shtatori i vitit 2008 kur kjo qendër ka filluar të funksionojë në Babrru. Gjatë kësaj periudhe ne nuk kemi patur ndonjë problem. Më datë 27.02.2009, rreth orës 16:30 unë kam qenë tek shtëpia në kohën kur ka ardhur shtetasja Ledina Doga dhe i fejuari i saj, emrin e të cilit nuk e di dhe më tha se i kishin vjedhur xhiron javore. Unë i thashë që të lajmëronte Policinë, Ledina më tha që tek qendra kishin shkuar dy inxhinierë për të rregulluar pajisjet dhe ajo akuzonte njërin prej tyre, i cili quhet Klodian Taçe. Unë e pyeta Ledinën se ku ishte Klodiani dhe pse nuk më lajmërove më parë dhe ajo tha se Klodiani me djalin tjetër kishin ikur nga klinika. Pas kësaj unë kam komunikuar me Policinë.
Mesa di unë, Ledina çdo ditë pasi mbyllej qendra shëndetësore, dorëzonte xhiron tek qendra kryesore në Tiranë dhe mesa di unë, Ledina ka qenë e rregulltë në dorëzimin e parave.
Teksa oficeri i Policisë Gjyqësore e pyet, mjeku shprehet se: Duke parë se Ledina ka njoftuar me vonesë dhe ajo nuk reagonte në të njëjtën mënyrë kur e pyesnim, si dhe Klodiani që akuzon Ledina është person i besueshëm nga ana jonë, unë mendoj se Ledinën nuk e kanë vjedhur por ajo i ka fshehur me qëllim për ti përvetësuar paratë.
