Një pjesë të përfaqësuesve të KiE, refuzuan të merrnin pjesë në darkën e organizuar nga Shqipëria në Strasburg. Ky detaj është konfirmuar dje në rrjetet sociale edhe nga kryeministri Edi Rama. Ndonëse shprehet se nuk i ka ardhur mirë për një gjë të tillë, kreu i qeverisë thotë se nuk është ndjerë shumë i suprizuar, sepse thotë se fjalimi i tij kundër raportit të Dick Marty-it ishte si një “rrufë në qiell të hapur” për ta.
Rama thekson se trafikimi i organeve nga drejtuesit e UÇK-së, që sot janë në Hagë, ishte thjesht një histori horrori e sajuar dhe e pabazuar në prova dhe fakte. Dy ditë më parë, nga Strasburgu, kryeministri Edi Rama e ka quajtur “fake news”, raportin e Dick Marty-t për krimet e pretenduara se janë kryer nga drejtuesit e UÇK -së gjatë luftës në Kosovë. Ai tha se ky raport ishte një dështim i turpshëm i diplomacisë ndërkombëtare, që duhet zhbërë pa humbur kohë.
Deputetja greke, Nina Kasimati, ka reaguar pas debatit me kryeministrin Edi Rama nga asambleja e KiE. Deputetja sqaron në rrjetet sociale se gjithçka nisi pas pyetjes së saj, se si po ecën procesi i anëtarësimit në BE, në një kohë kur Shqipëria forcon marrëdhëniet me një shtet kërcënues si Turqia. Po sipas saj, Rama e sulmoi verbalisht.
“Pak më parë, kryeministri i Shqipërisë, Edi Rama, më sulmoi fort verbalisht përpara seancës plenare të Këshillit të Evropës, pasi si përfaqësuese e përbashkët e Partisë të së Majtës Evropiane në Kuvend e pyeta zyrtarisht se si po ecte procesi i pranimit të Shqipërisë në BE, me gjithë marrëdhëniet gjithnjë e më të thelluara strategjike me shtetin “ofendues” Turqinë, duke pasur parasysh mbështetjen që vendi ballkanik merr nga vendet e rajonit që respektojnë acquis evropiane dhe të drejtën ndërkombëtare.
Përgjigjja fyese e zotit Rama “për zonjën” “gruaja greke” krahas një himni politik ndaj Turqisë, si dhe qëndrimi i tij provokues në përgjithësi, i paprecedentë në Strasburg, shkaktuan reagimin e krerëve të të gjitha grupeve politike, të cilët vendosën unanimisht në një shenjë mosmiratimi për të mos marrë pjesë në darkën zyrtare të thirrur nga kryeministri shqiptar”, thuhet në reagimin e saj.
