Sot PD përjashtoi deputetin ‘rebel’, Myslim Murrizi. Ky i fundit doli kundër vendimit të grupit, duke refuzuar që të heqë dorë nga mandati. I ftuar mbrëmjen e sotme në ‘Repolitix’, Myslym Murrizi tha se për asnjë arsye se nuk do të pranojë që të bëhet dele, ndërsa akuzoi se organet e PD-së janë bërë si Byroja Politike komuniste. Ai më tej se ky nuk ishte një vendim i papritur, ndërsa shtoi se hera e parë kur është përjashtuar ishte viti 2003.
“Titrat nuk besoj se anulojnë vendimin e Byrosë Politike. Ishte vendim i pritur, jo surprizë. Bijtë e këtyre që më kanë bërë biografinë, nuk mund ta pranonin që të isha deputet.
Ajo që më habit, demokratët prisnin që Kryesia dhe Këshilli, u nisën për të rrëzuar Ramën, dhe jo për të më shkarkuar mua, gjithë kjo kosto e madhe, do të kisha ikur vetë. Pasi nuk ka asnjë gjë nga kjo parti, janë njëlloj si shkarkimet e Kadri Hasbiut, etj. Mendojnë të shkarkojnë ata që u prishin punë. Nuk besoj se është vendim individual i Bashës, por i Kryesisë. Herën e parë jam përjashtuar në 2003 nga PD-ja. Unë nuk bëhem dele”, deklaroi ai.
Myslym Murrizi deklaroi se pavarësisht se nuk dogji mandatin, nuk do të bashkojë votën me PS-në në Kuvend.
“Basha ka qenë emigrant kur unë kam qenë në PD. Unë nuk kam ndërmend që të bashkoj votën me PS. Është vendim i stimuluar nga njerëz që e rrethojnë oborrin, dhe që mendojnë se do të vijnë në pushtet. Një pjesë presin të merrnin mandatin. Një farë vetëfajësimi i Bashës për listat. Nga ata që janë sot në Kryesi, 80% nuk kanë qenë në fushatë në 2017. Jam përdorur dy standarde për përjashtimin tim, por unë jam kryetar i PD-së në Lushnje, e mora dhe e ngrita”, tha ai.
