Deputeti i zgjedhur i Partisë Demokratike në Qarkun e Fierit, Luan Baçi, ka mbështetur homologun e tij socialist, për denoncimet me tenderat publikë në Bashkinë e Fierit dhe nga zyrtarë të tjerë socialist. Sipas Baçit, pushtetarët në Fier jo vetëm që kanë shpërdoruar fondet, por edhe kanë krijuar një klimë terrori.
“Ndërsa KM i vendit ‘kujdeset’ që ta lavderojë Subashin e bashkisë Fier, në një nga daljet e tij të shumta ne publik, për dy kanale kulluese që i ka pastruar mirë dhe nuk ka abuzuar duke bërë “namin” me 200 milionë lekë të vjetra si kolegu i Lushnjes, që ra në rrjetën e SPAK, Petrua i bën thirrje SPAK-ut, që të zbresë urgjent në Fier, për të mos e lënë qytetin në duart e krimit të organizuar dhe mafies që është lidhur fort dhe pazgjidhshmërisht me drejtuesit e institucioneve në Fier duke abuzuar dhe vjedhur me miliona euro fonde publike!”, shkruan Luan Baçi në faqen e tij në Facebook.
Ai ka mbështetur këtë hap të deputetit Petro Koçi, që akuzoi publikisht drejtuesit në Fier për shpërdorim fondesh, ndërkohë që nuk përjashtoi as përplasjen për interesa personale të grupimeve të ndryshme brenda mazhorancës.
“Ka reagime të shumta në rrjete sociale nga shumë drejtues socialiste të institucioneve, ku kundërshtojnë dhe sulmojnë Petron, për këtë qëndrim të tij dhe për denoncimin publik që ai ben, duke i quajtur të pabaza akuzat e tij dhe me qëllime të caktuara, për përfitime personale dhe për vendosje të kontrollit të vet mbi institucionet se sipas gojëve të liga, nuk e pyet askush nga drejtuesit dhe se ndihet jashtë loje! Unë jam dakort me z Koçi dhe e mbështes plotësisht atë!”, shkruan Baçi.
Deputeti i Partisë Demokratike, duke mbështetur denoncimet e kreut të PS-së dhe deputetit të zgjedhur, Petro Koçi, shprehet se këto denoncime janë në përputhje me denoncimet që ka bërë opozita gjatë këtyre viteve, e sidomos para zgjedhjeve të 25 prillit.
“Denoncimi i z. Koçi nuk është i pa dëgjuar dhe i panjohur nga qytetarët fierakë dhe nga gjithë vendi, pasi ka vite që Partia Demokratike ka denoncuar publikisht shkelje dhe abuzime të medha me tendera dhe fonde publike jo vetëm për Bashkinë Fier, por edhe për institucione të tjera!”, shkruan Baçi.
