Juristi Romeo Kara, në një prononcim për mediat shprehet se ish-kryeministri Berisha dhe familjarët e tij po i bëjnë presion duke e paditur në gjykatë, në mënyrë që të heshtë dhe të tërhiqet nga tre kallëzimet që ka bërë për ish-kryeministrin.
Sipas tij, gjyqi ka për qëllim të pengojë proceset e ardhshme ndaj korrupsionit, por juristi është i bindur t’i shkojë deri në fund të drejtës së tij.
Ndërkohë, Romeo Kara nënvizoi se në seancën e ardhshme do të kërkojë që prokurori i çështjes të përjashtohet.
“Nuk mund të rrimë kaq pasiv në një gjyq politik, ku mohohet e drejta e fjalës, dhe që ka për qëllim që të pengojë proceset ndaj korrupsionit galopant të Berishës dhe Metës. Kam bërë tre kallëzimeve. Do të kërkoj që të përjashtohet prokurori i çështjes, që mungoi sot. Për çudi është i njëjti prokuror për tre gjyqe, në dy prej të cilëve unë jam dënuar”, tha Romeo Kara.
Karaj ka kallëzuar penalisht në Prokurorinë e Përgjithshme, ish-kryeministrin Sali Berisha për një sërë shkeljesh.
Berisha akuzohet për “mashtrim, shpërdorim detyre dhe ushtrim ndikimi”, lidhur me negociatat për privatizimin e OSSH pesë vite më parë.
