Dy punëtorë humbën jetën një ditë më parë, si pasojë e punimeve në një pallat, ku për fat të keq u rrëzua skela metalike. Në lidhje me ngjarjen e ndodhur në rrugën “Faik Konica”, policia arrestoi në flagrancë shtetasit Xh. T. 41 vjeç, me detyrë Drejtues Teknik i punimeve në firmën “Xhimi”, si dhe I. B. 44 vjeç, me detyrë Drejtues Teknik i sigurisë së punimeve në firmën skela “Syla”.
Po kështu u bë shpallja në kërkim e shtetasit P. S., me detyrë administrator i firmës skela “Syla”, për veprën penale “Shkelja e rregullave të mbrotjes në punë”. Skela metalike u rrëzua rreth orës 15.00, e për pasojë humbën jetën shtetasit E.B., 31 vjeç, punëtor ndërtimi në firmën “Xhimi, si dhe shtetasi O.K, 36 vjeç, punëtor i firmes skela “Syla”. Po nga rrëzimi i skelës janë plagosur dhe janë jashtë rrezikut për jetën, shtetasit G.B., punëtor ndërtimi i firmës “Xhimi”, E.L dhe A.M, punëtor i firmës skela “Syla”.
Humbën jetën nga shembja e skelës/Dy në pranga e një në kërkim, policia sqaron çfarë ka ndodhur
Ky është burimi zyrtar ardhur nga ana e uniformave blu të Tiranës, e ndërsa përmes një videoje të publikuar në ‘Facebook’, ‘Nisma Thurje’ denoncon se në pallatin ku po kryheshin punimet, jeton zëvendës kryeministri Erion Braçe. Sipas denoncimit, në këtë pallat po implementohej një projekt i financuar nga Bashkia Tiranë, për rregullimin e fasadës.
“Në pallatin ku jeton Zv. Kryeministri Braçe po implementohej një projekt i financuar nga Bashkia Tiranë për rregullimin e fasadës.
Si pasojë e mungesës totale të sigurisë në punë, një orë më parë skeleria u shkëput e tëra, dhe për pasojë 2 punonjës humbën jetën e dy të tjerë po luftojnë me vdekjen në spital.
Ngushëllime familjeve të viktimave dhe shërim të shpejtë të plagosurve!
Policia dhe prokuroria kanë shumë punë për të bërë. Kjo ngjarje nuk mund të kalojë në heshtje e pa ndëshkim. Sepse kur nuk ka siguri teknike te projekti i Bashkisë në pallatin e Zv. Kryeministrit, kuptohet sa respekt ka në këtë vend për jetën e punëtorit.
Vlen më pak se një skelë! Dy Erionat mirë do jetë që si fillim të heshtin për ca kohë, sepse e dimë që për dorëheqje as nuk bëhet fjalë, por të paktën të heshtin në respekt të atyre që humbën jetën te fasada e tyre”.
