Zbardhet dëshmia e punonjëses e cila akuzon kreun e PD-së, Lulzim Basha se ka hyrë me dhunë në konviktin ku ajo punon.
Denoncimi u bë pasditen e sotme nga Bashkia e Tiranës, e cila akuzon Bashën se bashkë me 4 shoqërues kanë ushtruar ndaj një prej punonjësve, që kishte dezhurnin në godinën nr. 4 në Qytetin Studenti.
Në lidhje me këtë erdhi edhe reagimi i Partisë Demokratike e cila mohoi akuzat, teksa publikoi edhe një video për të vërtetuar se nuk ishte ushtruar dhunë ndaj punonjëses.
Ndërkohë, çështja ka përfunduar në prokurori ku ka nisur hetimi për dhunë.
“Sot mbasdite kam qenë e planizuar turni dytë dhe e kam filluar në orën 15,00 deri 23:00 dhe rreth orës 18:45 min tek recepsioni kam vënë re një student fillimisht që po qëndronte aty i cili quhet Xhesian Shazimani , i cili fle në katin e 2 dhoma 217. Ky student ka qëndruar aty rreth 5 min ka dalë jashtë godine dhe më pas ka hyrë ai me liderin e opozites Lulzim Basha dhe me disa persona të tjerë gjithsej rreth 6 apo 8 veta kanë hyrë pa më pyetur mua megjithëse unë ia kam kërkuar të ndalojnë pasi nuk lejohet me rregullore dhe ata me shtynë me forcë pasi ishin shumë persona.
Unë u mundova t’i ndaloj, por ata vazhduan lart në katin e dytë tek dhoma 217, dhe unë i ndoqa nga pas dhe kur arrita tek dhoma në fjalë, personat u ulën në dhomë brenda dhe dy prej tyre nxorën kamerat dhe të asaj dhome ishin studentë të cilët e kishin përgatitur ambientin , kishin vendosur karriget gati për të bërë filmim ndoshta intervistë. Kam marrë në telefon në nr. 112 të policisë, më pas kam njoftuar me tel admistratorin e godinës”, thuhet në dëshminë e punonjëses.
