Sot ka nisur procesi mësimor në zonat e prekura na tërmeti që goditi vendin më 26 nëntor. Gjatë dy javëve të fundit u inspektuan shkollat dhe godinat e arsimit në tre zonat e dëmtuara, Tiranë, Durrës dhe Kurbin dhe 30 shkolla u kategorizuan si të papërshtatshme dhe të rrezikshme për të zhvilluar mësim.
Mësohet se Ministria e Arsimit ka bërë zhvendosjen provizore të nxënësve nga shkollat dëmtuara. Ata do të zhvillojnë mësim në shkollat në afërsi të tyre. Llogaritet të jenë rreth 15 mijë nxënës, të cilët duke filluar nga sot nuk do të zhvillojnë mësim në klasat e tyre.
Ndërsa, për shkollat e tjera për të cilat ministria ka dhënë “ok” ka rifilluar mësimi i zakonshëm.
Kujtojmë se tërmeti i 26 nëntorit mori 51 jetë njerëzish dhe la pas qindra të plagosur si dhe shumë banesa të shkatërruara.
