Pas kontaktit me një të infektuar me Covid, kryeministri britanik, Boris Johnson është detyruar të karantinohet. Edhe pse përgjigjja e testit i ka dalë negativ, ai është futur në vetizolim për 14 ditë.
Johnson u testua me anë të një testi të shpejtë që nuk ka nevojë të përpunohet në laborator, por që nuk është ende i disponueshëm për qytetarët. Ai nuk ka simptoma dhe punën do ta vazhdojë nga ambientet e shtëpisë së tij.
Në muajin prill Johnson së bashku me partneren e tij, e cila ishte edhe shtatzënë, u infektuan me koronavirus, me kryeministrin që u detyrua që 3 ditë t’i kalonte nën kujdesin intensiv, por ia doli ta mposhte virusin vdekjeprurës.
Kryeministri tashmë ka deklaruar se ai ka krijuar antitrupa pas kalimit me sukses të infektimit para disa muajsh.
