Presidenti Ilir Meta mëngjesin e sotëm firmosi para mediave çdekretimin e zgjedhjeve të 30 qershorit, për të qetësuar situatën aktuale politike në Shqipëri. Por ky vendim nuk është përshëndetur nga të dyja palët, pasi qeveria Rama ka vazhduar të ecë e vendosur se do ti zhvillojë zgjedhjet, ndërsa nga ana tjetër opozita e bashkuar e cilëson si fitore.
Shpëtim Idrizi, kreu i Partisë për Drejtësi, Integrim dhe Unitet, duke folur për News 24 tha se dekreti i Presidentit Ilir Meta ka ndihmuar në radhë të parë kryeministrin e vendit.
“Dekreti i Presidentit në radhë të parë ka ndihmuar Edi Ramën, po të marr variantin që do hynte në zgjedhje si Enver Hoxha. Në çfarë situatë do ishte Shqipëria? E shoh si një shteg për turistin Rama që t’i thërrasë arsyes. Fakti që nuk ka dekretuar një datë tjetër, Presidenti i ka lënë shteg gjetjes së një zgjidhje politike”, u shpreh ai ndër të tjera.
Dekreti i Presidentit për të shfuqizuar datën e zgjedhjeve është një mundësi shumë e mirë për zgjidhjen e krizës politike.
“Kemi një qeveri që doli nga zgjedhje të kontestuara. Këtu qeveris portali i Ramës, institucionet s’bëjnë gjë tjetër veçse i kthejnë përgjigje portalit. Kemi një parlament kukull, ndërsa sistemi drejtësisë është drejt kapjes. Jemi sot pa Gjykatë Kushtetuese, kemi një ekonomi që po shkon në drejtim të paditur, 2,2 mld euro kanë shkuar në drejtim të paditur.
Nga ana tjetër është e pamundur të bëhen zgjedhje vetëm me një parti. 30 Qershori dhe dekreti i Presidentit janë një mundësi shumë e mirë për zgjidhjen e krizës politike. Kush janë zgjidhjet politike? Opozita e ka dhënë zgjidhjen: Në momente krizash vendi shkon në zgjedhje të parakohshme, ndryshe do rrëshqasim”,- tha Idrizi.
