Ministrja e Arsimit, Sportit dhe Rinisë, Besa Shahini ka deklaruar nga foltorja e Kuvendit se nota mesatare për degën e Mësuesisë do të shkojë në 8, ndërsa tha më tej se Universiteti i Mjekësisë ka vendosur një notë mesatare akoma më të lartë.
Sipas Shahinit, duhet t’i jepet një fuqizim edhe arsimit profesional për të kontribuar në tregun e punës.
“Më herët mësuesit dilnin nga universitete si Kristali dhe Vitrinat. Ndërsa kur erdhi PS po ndryshohen standardet pasi arsimtarët duhet të jenë me rezultate të larta dhe të kualifikuar. Qëllimi për përcaktimin e notës mesat are për pranimin në ciklin e parë dhe të dytë të studimeve është mbështetje e strategjive në funksion të përmirësimit të shërbimit të arsimit të lartë dhe mbështetja e arsimit profesional. Duhet t’i jepet një fuqizim edhe arsimit profesional për të kontribuar në tregun e punës. Cilësia e mësuesve është thembra e Akilit. Një pjesë e mësuesve, këtë e ka thënë edhe Lindita Nikolla nuk janë në nivelin e duhur.
Ligji i arsimit të Lartë të vitit 2015 i jep këshillit të ministrave tagrin për përcaktimin e një note mesatare. Do e çojmë në 8 notën mesatare për degën e Mësuesisë.
Universiteti i Mjekësisë ka vendosur të shkojë përtej vendimit tonë duke vendosur edhe një notë akoma më të lartë mesatare. Kam biseduar me shumë maturantë. I kam njoftuar për vendimin që do merret. Kemi pasur edhe kritika. Miratimi ka qenë nga ata pedagogë që kërkojnë një selektim, ndërsa kritikë kanë qenë ata që mendojnë se do zvogëlohet numri i nxënësve për lëndën e tyre”, tha Shahini.
Kuvendi i Shqipërisë po zhvillon sot seancën e fundit parlamentar për këtë sezon, ku po mbahet një interpelancë e thirrur me ministren Besa Shahini.
