Kryetari i Bashkisë së Tiranës, Erion Veliaj është thërritur për të dëshmuar në mbledhjen e Komisionit Hetimor për inceneratorët. Sot pritet për të dëshmuar Sekretari i Përgjithshëm i Kryeministrisë, Ëngjëll Agaçi, kryebashkiaku i Tiranës, Erion Veliaj, deputeti i PS, Alqi Bllako, dhe ish-ministri i Energjetikës, Damian Gjiknuri.
Kryebashkiaku është pyetur nga kryetarja Jorida Tabaku, nëse i njeh tre personat që janë në kërkim për këtë aferë, Klodian Zoto, Klodian Mërtiri dhe Stela Gugallja. Me ironi, Veliaj tha se i njeh vetëm nga portalet, nga fotot me zyrtarin e PD, Gert Bogdani në Zimbabve. Sakaq, Tabaku iu drejtua duke i thënë se dëshmia e rremë përbën vepër penale. Dëshmia e Veliajt po shoqërohet nga debate të ashpra.
Kryebashkiaku i Tiranës Erion Veliaj dhe kryetarja e Komisionit Hetimor për Inceneratorët kanë debatuar ashpër që në fillim të dëshmisë së Veliaj.
– Tabaku: A e njihni Klodian Zoton apo Mirel Mërtirin?
– Veliaj: E kam parë në fotografi me Gert Bogdanin që ka qenë në atë kohë drejtues i marrëdhënive me jashtë në PD.
– Tabaku: A keni bërë udhëtime me ta?
– Veliaj: Nuk kam bërë asnjë udhëtim, por jam informuar për udhëtimin e tyre në Zimbabve me zyrtarë të PD.
–Tabaku: A keni pasur komunikim me telefon?
– Veliaj: Nuk kam kryer asnjë udhëtim apo komunikim. Jam njohur nga mediat se drejtues të PD-së kanë udhëtuar me ta. Pra, nëse i njoh vetëm përmes medias me udhëtimin e tyre në Zimbabve. I njoh vetëm nga portalet për udhëtimin e tyre në Zimbabve me drejtues të PD. Ju keni abuzuar. Unë jam betuar, ju jeni betuar që nuk do të gënjeni?
-Tabaku: Dëshmitar, fokusohuni te pyetjet e mia. Unë jam betuar si deputete e Kuvendit të Shqipërisë.
Sa i takon dëshmisë së Veliajt, një reagim është përcjellë nga kryetarja e LSI-së, Monika Kryemadhi.
“Erion Veliaj i kupton shumë mirë kompetencat e Këshillit Bashkiak. E kupton aq mirë sa edhe për 30 mijë lekë të vjetra duhet miratimi i Këshillit Bashkiak. Shikojeni si e ka thënë me zërin e vet, që si Kryetar Bashkie nuk miratonte dot ndihmën ekonomike pa këshilltarët e Këshillit.
Pra për 30 mijë lekë të vjetra duhet Këshilli, për pagesa ndaj koncesionit 30 vjeçar nuk i duhej. SPAK, po dëgjon?”.
