Kryeministri Edi Rama ka folur nga Berlini lidhur me shqetësimin e ngritur nga debati i gjerë në Britani për emigrantët shqiptarë, pas deklaratave nga politikanë britanikë që flasin për “pushtim nga shqiptarët në kufi”. Rama tha se ky është një problem që e ka Britania e duhet ta zgjidhë, duke mësuar nga Gjermania. Kreu i qeverisë mori si shembull Gjermaninë, ku tha se nuk ka dëgjuar asnjë politikan gjerman që të flasë me atë gjuhë për shqiptarët, apo që t’i cilësojë si kriminelë.
“Unë mendoj që ky vend këtu është një shembull. Gjermania pati një problem të ngjashëm, ku me valën e madhe, krizën e refugjatëve, njerëz nga rajoni e Shqipëria shkuan e nuk dëgjova asnjë politikan e jo më ministra të flasin për pushtim.
Nuk dëgjova kurrë asnjë politikan gjerman e jo më ministër të qeverisë të flasë për shqiptarët që janë kriminelë e sjellin kriminelë, por pashë një qeveri mjaft të interesuar për ta trajtuar cështjen me dinjitet e respekt e për të ecur në mënyrë konkrete duke e radhitur Shqipërinë në vendet e origjinës së sigurt, duke forcuar sistemin e aplikimeve e duke i dhënë fund asaj trazie të atij momenti në mënyrën më dinjitoze e të respektuar.
Ndaj në vend që të ndizej një narrativë e cmendur pushtuesish e gangsterësh, lidhur me kufirin, përfaqësuesit britanikë duhet të vijnë në Gjermani e të mësojnë shpejt e të ndreqin problemet e veta.
Ne në Shqipëri s’jemi të ndreqim problemet që kanë në Britani. Kujtoj këtu që qytetarët tanë që kanë mbërritur në Francë, kanë qenë të ligjshëm.
Nëse ka problem mes kanalit ta zgjidhin. Ne jemi shumë të lumtur të bashkëpunojmë, por s’duhet të pranojmë kurrsesi këtë lloj retorike. Shqiptarët në Britani janë komunitet i integruar plotësisht.
Në burgjet britanike, shifrat flasin për më pak se 1 % të shënjestrosh një komunitet e të flasësh për kriminelë nuk tingëllon diçka shumë britanike, por si një britmë nga një çmendinë”.
