Pas përfundimit të mbledhjes së Grupit Parlamentar, e cila u shoqërua me debate, ish-kryeministri Sali Berisha është prononcuar për mediat. Ai tha se vendimi që pretendon z. Alibeaj se Berisha është i përjashtuar nga Grupi Parlamentar i PD-së është nul dhe nuk egziston.
“Vendimi që pretendon z. Alibeaj është nul dhe nuk ekziston. Ky është qëndrimi i bazuar në të gjitha ligjet e vendit dhe ligjet e PD. Të krahasosh fituesin me humbësin, është një gabim i madh logjik.
Grupi do të diskutojë, do të ketë mbledhje, është organ legjislativ i PD që do të bëj debate për të gjitha. Është rast unik që PD të bashkohet me diversitetin e saj.
Ka diversitet, që e bën edhe më demokratike PD. Kjo është e vërtetë. Cilido që mendon bën zgjidhjen e tij, demokratët kanë folur për këtë, kanë folur me 11 Dhjetor dhe 6 Mars”, tha Berisha.
Sakaq, kreu i Grupit Parlamentar, Enkelejd Alibeaj deklaroi se ish-kryeminstri Berisha nuk është pjesë e Grupit Parlamentar, pasi është i përjashtuar.
“Sinjalet nuk mund të jepen duke pushuar selinë, duke ardhur në mënyrë të dhunshme si Berisha. Ka një vendim të Parlamentit, i cili ka konstituar cili është Grupi Parlamentar i PD, Berisha nuk është pjesë.
Për të gjetur gjuhën e përbashkët, ca akte të rëndësishme që të perceptohen nga njerëzit, ndërprerja e gjuhës linçuese, proceset paralele që zhvillohen për të thellluar ndasinë nuk japin sinjale bashkimi. Të ndërpritet kjo gjuhë, dhe këto sinjale të njëanshme që demokratët në bazë të bashkohen. Ky është hapi i parë”, tha Alibeaj.
