Rishikimi i projektit të vijimit të autostradës Joniane drejt pikës kufitare të Kakavijës nga Ministria greke e Infrastrukturës po ngjall debate të ashpra në rajonin verior grek të Janinës, fqinj me Shqipërinë.
Bashkitë e rajonit verior grek, por edhe grupe të biznesit dhe shoqata turistike po kundërshtojnë fort planet e qeverisë së re të Kryeministrit Mitsotakis ku parashikohet ndryshimi i projektit dhe shkurtimi i buxhetit.
Debatet nisën pas një seance në Parlamentin grek ku njëri nga deputetët e Janinës kërkoi që autoritetet e Ministrisë greke të Infrastrukturës të shpjegonin vonesën për fillimin e projektit rrugor që ishte gati që në vitin 2013.
Por Ministria u përgjigj se po rishikonte projektin dhe shkurtimin e buxhetit duke parashikuar një rrugë kombëtare dhe jo autostradë në drejtim të Kakavijës.
Kryetari i Bashkisë së Janinës dhe 4 bashkive kufitare me Shqipërinë, Prefekti i rajonit, disa shoqata rajonale që lidhin aktivitetin me turizmin dhe biznesin i kanë kërkuar qeverisë greke me tone të forta në deklarata publike që projekti të zbatohet siç është parashikuar.
Ndryshimi i projektit që lidh Rrugën Joniane me Kakavijën, sipas tyre, do të cenonte zhvillimin e rajonit.
Autostrada Joniane është ndërprerë në periferi të Janinës dhe segmenti që duhet ta lidhte me Kakavijën në kufi me Shqipërinë, rreth 90 kilometra e bën atë pjesë të boshtit të rrugës joniane të Ballkanit perëndimor.
Ky bosht rrugor fillon nga Trieste, në Itali, përshkon Slloveninë, Kroacinë Malin e Zi dhe Shqipërinë dhe arrin deri në Pikën kufitare të Kakavijës në kufi me Greqinë, shkruan “Voa”.
Shqetësimit të qeverive vendore fqinje me Shqipërinë iu bashkuan edhe drejtuesit vendorë në Gjirokastër dhe organizmat e biznesit.
Kryetarja e Qarkut të Gjirokastrës Lindita Rova i tha Zërit të Amerikës se “do të ndanin vullnetin e përbashkët me Qarkun e Janinës për nxitjen e fillimit të projektit të superstradës”.
Ndërsa Kryetari i Dhomë së Tregtisë së Gjirokastrës Maksi Hoxha tha se “infrastruktura rrugore është mjaft e rëndësishme për shkëmbimet mes dy rajoneve”.
“Sapo firmosëm edhe një marrëveshje me Dhomën e Tregtisë së Janinës për paketa të përbashkëta turistike dhe një bashkëpunim të gjerë rajonal”, tha Hoxha.
