Ambasadorja e SHBA-ve në vendin tonë, Yuri Kim ka reaguar pas vendimit të Departamentit amerikan të Shtetit, për shpalljen ”non grata” të ish-kryeministrit Sali Berisha dhe familjes së tij.
Kim ka ripostuar në rrjetin social Twitter, vendimin e DASH si dhe deklaratën e Sekretarit amerikan të Shtetit, Antony Blinken.
Diplomatja nuk ka bërë komente të tjera përveç vendimit të DASH, të cilin e ka shpërndarë në profilin e saj.
— Ambassador Yuri Kim (@USAmbAlbania) May 19, 2021
Ish-kryeministri Sali Berisha u shpall non-grata sot nga Departamenti Amerikan i Shtetit bashkë me familjen e tij.
Lajmi për shpalljen ”non grata”, u dha nga Sekretari Amerikan i Shtetit, Antony Blinken, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
