Kryeministri Edi Rama ka reaguar për herë të parë lidhur me takimin që pati mbrëmjen e sotme me homologun e tij grek, Kyriakos Mitsotakis.
“Athinë – Një darkë e bukur me kryeministrin e Greqisë, Kyriakos Mitsotakis, që ofroi përzemërsisht mikpritjen e tij. Marrëdhëniet e shkëlqyera mes dy popujve janë busulla jonë drejt shkëlqimit të marrëdhënieve mes dy vendeve”, shkruan kreu i qeverisë në rrjetet sociale, teksa ka publikuar edhe një video të takimit.
Dy kryeministrat u shfaqën të qeshur, ndërsa në momentin e takimit ishin me maska dhe përshëndetjen e shkëmbyen me brryl. Në takim, kryeministri Rama u shoqërua nga drejtori i Komunikimit në Kryeministri Endri Fuga dhe ambasadorja jonë në Athinë.
Ndërsa në krah të Kyriakos Mitsotakis ishin ministri i jashtëm Nikos Dendias dhe ambasadorja greke në Tiranë. Mes shumë çështjeve që janë diskutuar mes palëve, ka qenë edhe ajo e kufirit detar.
