Komisioni i Ekonomisë miratoi propozimin e qeverisë për shkarkimin e Arben Malajt nga Bordi Mbikëqyrës i Bankës së Shqipërisë. Ish-ministri i Financave dhe specialisti i ekonomisë, Arben Malaj, u paraqit sot në Komisionin e Ekonomisë, ndërsa tha se akuzat e deputetëve të ngritura në adresë të tij nuk qëndrojnë. Ish-ministri i Financave, Arben Malaj, tha se beteja e tij nuk mbaron këtu, por do të kërkojë të drejtën deri në Gjykatën e Strasburgut.
Nga ana tjetër, avokati mbrojtës i Arben Malajt, Jordan Daci, duke folur për “FaxNews”, shpërtheu në akuza të rënda kundër qeverisë lidhur me procesin që ka nisur për shkarkimin e anëtarit të Bankës së Shqipërisë. Ai hodhi akuza mbi Kuvendin dhe qeverinë, se po tentojnë të shkarkojnë Malajn pa pasur asnjë provë. Po kështu, këtë akt e cilësoi si një dalldisje të mazhorancës.
“Nuk mundet që ne të shkarkojmë një anëtar të Bankës së Shqipërisë, si të ishte kryetar i kooperativës. Mbledhja nuk është e zakonshme, është procedim disiplinor.
Në këtë kuptim, nuk mund të bëjnë procedim disiplinor siç jua do qejfi atyre. Ata mua nuk më dhanë fjalën as për procedurë, dhe nuk mund të vazhdonte diskutimi pa u shprehur për kërkesat tona paraprake.
Nga ana tjetër, bëhet fjalë për një akuzë që duhet të jetë specifike. Nuk mund t’i thuash tjetrit ti se mua nuk më pëlqen modeli yt i flokëve. Ata nuk kanë prova. Nuk kanë asgjë në ato tek të cilat ata referohen.
Kjo është një dalldisje e një mazhorance të çmendur, që do të na çmendë edhe ne të tjerëve meqë ata janë çmendur. Janë 28 deputetë që kanë firmosur për shkarkimin e Malajt. Ka edhe vendimin e qeverisë”, deklaroi avokati.
