Çështja e koronavirusit, më shumë se sa një emergjencë globale shëndetësore, shihet si një konkurrencë e fortë mes SHBA-së dhe Kinës. Presidenti Donald Trump e ka cilësuar “koronavirusin”, si “virusi kinez”, ose “virusi nga Wuhani”. Kjo nuk është e paqëllimtë, pasi synon të lidhë jo vetëm origjinën gjeografike të virusit, por edhe “fajin” e përhapjes së tij. Nga ana tjetër, qeveria kineze e akuzon SHBA-në, për përhapjen e panikut ndaj shpërthimit të koronavirusit.
Këto pamje të rralla dëshmojnë punën e shkencëtarëve, të cilët kryejnë kërkime në një laborator të viruseve, ku mendohet se doli edhe koronavirusi. Instituti i Virologjisë në Wuhan, i cili mban më shumë se 1.500 lloje të viruseve vdekjeprurëse, është bërë qendra e polemikave mes krizës globale.
Një video e transmetuar nga televizioni shtetëror kinez CCTV në muajin shkurt, ofron një paraqitje të shkurtër në Institut. Thuhet se laboratori ka tre dhoma testimi, dy dhoma për ruajtjen e kafshëve, një “kuti” me viruse dhe një dhomë për “shpërndarjen” e kafshëve. Studiuesi Zhang tha se ndërtesa ishte projektuar në atë mënyrë, që ajri mund të rrjedhë vetëm në laborator nga jashtë, dhe jo anasjelltas.
Aktualisht, situata paraqitet më e qetë në Kinë. Gjatë 24 orëve të fundit janë konfirmuar vetëm 11 raste të reja, dhe numri i viktimave ka shkuar në 4.632. Amerika është vendi i parë në botë për numrin më të lartë të viktimave, pasi aty kanë humbur jetën deri më tani 42.518 persona dhe 792.938 janë të prekur nga COVID-19.
