Ministri i Brendshëm, Blendi Çuçi, i është përgjigjur interesimit nga ana e deputetëve të opozitës, për shkarkimin e Drejtorit të Përgjithshëm të Policisë së Shtetit, Ardi Veliu.
Deputeti i PD-së, Luan Baçi, ka pyetur Ministrin e Brendshëm në Komisionin e Sigurisë Kombëtare, nëse është shkarkuar apo jo Ardi Veliu. Por ministri Çuçi as nuk e pohoi, por dhe as nuk e mohoi, duke dhënë një përgjigje evazive. “Do e merrni vesh në kohën e duhur, kur do i mbarojë apo jo kandili”, tha Çuçi.
Në media po qarkullon lajmi se është shkarkuar nga detyra Drejtori i Përgjithshëm në Policinë e Shtetit, Ardi Veliu, ndonëse ende nuk ka një konfirmim zyrtar nga qeveria. Gjithashtu nuk dihen shkaqet e shkarkimit të tij nga detyra.
Veliu u emërua në këtë detyrë në shkurt të vitit 2018. Mbetet për t’u parë nëse shkarkimi i tij erdhi pas ngjarjes në Lezhë, ku mbeti i pajetë një efektiv policie. Ndërsa një ditë më parë një avion u rrëzua në Vermosh, dhe ende nuk janë zbardhur shkaqet apo personat që ndodheshin në të.
Kryeministri Rama i vendosi 100 ditë afat drejtuesve të Policisë së Shtetit, që të gjejnë dhe të çojnë para drejtësisë të gjithë të infiltruarit brenda uniformave blu, që bashkëpunojnë me krimin. Ai kërkoi që uniformat blu të jenë në tjetër nivel. Rama tha më tej se çdo qark duhet të japë patjetër rezultat, për të dhënë shembujt e qartë se nuk ekziston pandëshkueshmëria në Policinë e Shtetit.
