Në një dalje për mediat, sekretari i përgjithshëm i LSI, Endrit Braimllari, u shpreh se partia e tij ka marrë vendim që nesër të mbështes protestën e artistëve. Kryesia e LSI-së ka vendosur që të jetë në mbështetje ndaj gjithë aktiviteteve publike të Aleancës për Mbrojtjen e Teatrit. Një thirrje vjen edhe ndaj Policisë së Shtetit, që të mos krijojë incidente.
“Kryesia e Lëvizjes Socialiste për Integrim, vendosi që të mbështesë plotësisht tubimin e thirrur nesër nga Aleanca për Mbrojtjen e Teatrit, në orën 16:30, në Bulevardin Dëshmoret e Kombit, përballë Ministrisë së Brendshme. Kryesia vendosi të mbeshtesë në menyre të vazhdueshme të gjitha aktivitetet publike të Aleancës për Mbrojtjen e Teatrit.
Ndaj ju bëjmë thirrje të gjithë strukturave të LSI, të gjithë simpatizanteve, mbështetësve dhe miqve të saj për të marrë pjesë masivisht në këtë tubim. I bëjmë thirrje Policisë së Shtetit, të mos ndalojë dhe të krijojë incidente pjesëmarrësve në tubim. I bëjmë thirrje të gjithe qytetarëve, veçanërisht të Tiranës që të marrin pjesë masivisht, për t’i treguar Edi Ramës dhe klikës së tij mafioze që është populli Zot i fateve të veta“, u shpreh Braimllari.
Edhe kreu i PD-së, Lulzim Basha ka bërë me dije se do t’i bashkohet nesër protestës së Aleancës së Mbrojtjes së Teatrit.
