Presidenti amerikan Donald Trump, ka lëshuar një deklaratë të fortë, ndërsa pretendon se iteligjenca amerikane e kishte njoftuar që në janar për COVID-19. Në një kohë kur SHBA e ka vënë me ‘shpatulla pas murit’ Kinën, që të mbajë përgjegjësinë për koronavirusin, Trump hedh shashkën e radhës.
Me anë të një postimi në Twitter, Trump shkruan se ai ishte informuar nga inteligjenca amerikane për epideminë e koronavirusit që në muajin janar. Pas këtij informacioni, shprehet ai, janë shpëtuar dhjetra jetë njerëzish duke bërë të mundur ndalimin e udhëtimeve nga Kina.
Sipas një zyrtari të administratës amerikane, i cili foli para mediave, presidenti amerikan Donald Trump kishte marrë dy njoftime nga inteligjenca mbi koronavirusin.
Njoftimi i parë i kishte ardhur 8 ditë përpara se ai të mbyllte kufijtë me Kinën, dhe njoftimi i dytë në fund të janarit. Në njoftimin e parë thuhej se koronavirusi mund të përhapet në nivel global, dhe se shumë nga të infektuarit mund të vdesin.
Njoftimi i dytë ishte në 28 janar, kur Trump mori informacione se virusi tani po përhapet edhe se vdekjet ishin të përqendruara në Kinë. Trump-it gjithashtu iu tha se Kina nuk dëshironte të ndante të dhënat që kishte për epideminë me SHBA.
“Unë mendoj se kinezët bënë një gabim. Ata u përpoqën ta fshehin koronavirusin, por dështuan”, tha presidenti amerikan.
