Një ndër çështjet që ka hasur shumë debat, lidhet me faktin nëse do ketë rikthim apo jo të COVID-19 në vjeshtë. Mjeku Tritan Kalo u shpreh se nuk bëhet fjalë për një rikthim, por virusi do të rishfaqet ashtu siç rikthehen infeksionet e tjera.
“Unë po e shpreh tek ju, nuk është hera e parë që e kam thënë. Nuk bëhet fjalë për rikthim, por rishfaqje sepse infeksioni nuk do të zhduket. Në vjeshtë bashkë me kthimin e infeksioneve të tjera, detyrimisht një pjesë e infeksioneve do shfaqen, dhe midis tyre do të ketë të sëmurë nga COVID-19”, theksoi ai në “Euronews Albania”.
Ndër të tjera, doktori shpjegoi dy fenomene që po ndodhin në Shqipëri, për të cilat mban një qëndrim shumë kritik. Ai mbajti një qëndrim tejet kritik ndaj klasës politike, që e ka keqpërdorur sipas tij, këtë situatë.
“Pakënaqësia ime lidhet me dy probleme kryesore. Së pari për shkeljen dhe mosndërgjegjësimin qytetar, i cili çalon. Një popullatë që është aktive, nuk ka pse të bëhet pre e infeksionit të tillë. Nuk kemi njerëz për të humbur.
E dyta, ajo që më shqetëson është politizimi i gjërave të pavlefshme. Nuk bëhet politikë me sëmundjen, me të vdekurit, me pandeminë. Politika bëhet me politika shëndetësore, me përmirësimin e sistemit shëndetësor. Një popullatë e shëndoshë tregon vitalitetin e një kombi në të ardhmen”, përfundoi ai.
