Kryeministri Edi Rama përmes një video-mesazhi në rrjetin social Facebook, u bëri thirrje qytetarëve shqiptarë që të respektojnë masat e marra nga qeveria për të frenuar përhapjen e koronavirusit.
“Pash Zotin mos na turpëroni! Duhet t’ja dalim me çdo kusht… duke shtrënguar dhëmbët. Duke u bërë të gjithë ushtarë në frontin e vet në shtëpi, në kolltuk dhe duke mos e bërë njëri-tjetrin viktimë të pakujdesisë sonë. Atë që armiku do na e bëjë, ne të mos e shtojmë. Ne do ta fitojmë me çdo kusht këtë luftë”, tha Rama.
Po ashtu Kreu i Qeverisë bëri me dije se “Operacioni humanitar ka ndihmuar në 72 orët e fundit 14428 familje më në nevojë… 11089 familje me ndihma ushqimore; 1203 familje me medikamente dhe 2136 të tjera për nevoja të tjera urgjente”.
Kujtojmë se ditën e sotme në Shqipëri janë konfirmuar 13 raste të reja me COVID-19, duke e çuar numrin total të të prekurve në 89.
“Tre raste kanë lënë aktualisht spitalin, por është rritur numri i rasteve në spital. Pas daljes nga spitali, tre pacientët duhet të qëndrojnë në karantinë 14 ditë. 804 raste të dyshuara dhe prej tyre 89 raste me Covid-19. Mosha mesatare e rasteve është 45 vjeç”, sqaroi më herët Drejtorja e Institutit të Shëndetit Publik, Albana Fiço.
