10 mjekët shqiptarë që u dërguan në mision ndihme në Itali kanë filluar punën ditën e sotme në spitalin e Brescia-s.
Ndërsa 20 infermierët mësohet se do të fillojnë punën nesër, të ndarë sipas pavioneve ku janë nevojat më të mëdha.
Ministrja e Shëndetësisë dhe Mbrojtjes Sociale, Ogerta Manastirliu u lidh drejtpërdrejt me mjekët, duke i shprehur atyre mbështetjen për këtë mision humanitar.
“Ne mjekët filluam të gjithë punë sot, infermierët do të fillojnë nesër. Reanimatoret kanë filluar punë në reanimacion, ndërsa unë me gjithë doktoreshën tjetër jemi tek repartet e COVID subintensiv, në repartet e pneumologjisë. Ndërsa doktoresha që vinte nga Instituti i Shëndetit Publik është tek tamponët me gjithë dy mjekë të tjerë. Ndërsa dy mjekë janë vendosur në triazhim. Edhe infermierëve u kanë përcaktuar vendet dhe po i pajisin me veshjet e duhura dhe nga nesër do të fillojnë shërbimin”, tha Ermal Pashai, një nga mjekët e dërguar në Itali në misionin humanitar.
Ndërkohë Ministrja e Shëndetësisë Ogerta Manastirliu iu tha: “Ju jeni krenaria jonë, ne kemi besim tek ju dhe do të doja që nëpërmjet jush dhe gjithë ekipit tjetër t’ju uroja suksese në këtë mision humanitar”.
