Ministri i Bujqësisë Bledi Çuçi ka komentuar së fundmi situatën e krijuar nga koronavirusi në vend teksa theksoi se bujqësia nuk ka ndaluar së prodhuari.
Madje ai deklaroi se ka rritje të eksporteve në krahasim me 2019-ën.
“Kam marrë sot raportin për eksportin dhe pashë se ka 18 përqind më shumë eksporte se viti 2019-të. Ne morëm të gjitha masat. Kastraveci ka pasur një rënie të vogël. Kjo gjë lidhet me shitjen. Rënie të eksportit ka pasur edhe luleshtrydhja.
Për pjesën tjetër të produkteve, ka pasur një rritje. Muaji mars 2020 është më mirë se mars 2019, po ashtu tre mujori i vitit 2020 është më mirë se i 2019”, tha Çuçi.
“Ne jemi munduar që të mbulojmë pjesën e luleshtrydhes. Ne kemi bërë politika të atilla, që të ketë pozitivitet në sektorin bujqësor. Ju bëj thirrje të gjithë personave në fshat që punojnë tokën, që mbarshtojnë etj. Nuk ka pasur asnjë ndalje të punës në fshat.
Fermerët kur të punojnë duhet të marrin masat për koronavirusin, siç është thënë në televizion. Masat duhet të merren një më një. Mund të ketë një ç’ekuilibër mes tregut dhe ofertës. Nuk ka vend në Europë që nuk ka një produkt të importuar nga Shqipëria”, vijoi ai.
