Kryetari i PD-së, Lulzim Basha është shprehur se qeveria ka njoftuar anulimin e prokurorimeve që nuk lidhen me emergjencën e krijuar nga koronavirusi.
Në një videokonferencë me gazetarët, Basha theksoi se kjo kërkesë ishte përsëritur disa herë nga opozita, për shkak të kushteve ku ndodhet vendi.
Sipas kreut të opozitës, nëse ky vendim do të zbatohet, do t’i kursejë shqiptarëve plot 200 milionë euro.
“I kam kërkuar qeverisë të anulojë çdo procedurë prokurorimi që nuk lidhet me emergjencën e COVID -19. Sot mësuam, nga APP se qeveria ka vendosur anulimin e prokurorimeve, uroj të jetë një lajm i vërtetë. Më mirë vonë se kurrë. I kërkoj qeverisë ta ktheje në vendim të qartë e të prerë. Sot emergjenca është menaxhimi i situatës mjekësore.
Kërkesa e opozitës është kthyer në njoftim të APP, e shumë shpejt uroj të kthehet në vendim. Tenderët abuziv e të panevojshëm duhet të anulohen me vendim qeverisë. Por edhe ky njoftim është i mirëpritur. Ndonëse i vonuar e përshëndes këtë hap, nëse zbatohet do i kursejë shqiptarëve 200 mln euro.
Kërkoj transparencë totale në zbatimin e këtij vendimi. Do monitorojmë në mënyrë të përditshme që mos ketë asnjë hapësirë për abuzuesit. Çdo procedurë duhet të jetë transparente. Transparenca do të mbetet fokusi ynë për të mbrojtur çdo qindarkë të taksapagueseve, i cili duhet të shkojë në shërbim të shëndetësisë”, tha ai.
