Kryetari i PD-së Lulzim Basha në një lidhje live për emisionin “Kjo Javë” në “News 24” deklaroi se ai vetë nuk ka frikë nga koronavirusi, por shqetësohet për prindërit e tij.
“Nuk kam frikë, kam shqetësim për prindërit, por edhe për ata që nuk janë mirë me shëndetin. Askush nuk duhet të jetë konfident. Të marrë masa për veten, të afërmit, qytetarët. Nuk duhet të lodhemi nga domosdoshmëria për të respektuar distancën, higjienën”, theksoi Basha.
Ky i fundit vijoi më tej, duke deklaruar se pasojat do t’i vuajnë të moshuarit.
“Kosova ka vepruar edhe më shpejt edhe më mirë. Thirrja është nëse kemi të njëjtin fokus dhe veprim me të njëjtën energji si propaganda atëherë do të shkojë mirë. Duhen marrë parasysh interesat e të gjithë shqiptarëve.
Detyra ime sot është të bëj gjithçka si kreu i PD, bashkëqytetar, familjar, kryefamiljar, bir. Të jap këto aspekte që të kalojmë me pak dhimbje dhe pak viktima. Sot kemi vetëm një interes, shëndeti, siguria dhe ekonomia. Kemi zero interes politik”, tha Basha.
