Nga: Eduard Zaloshnja
Njësoj si para zgjedhjeve të 2017-ës, Rama po i realizon lëvizjet shahistike që i dhanë atëherë 74 mandate parlamentare. Përmes marrëveshjes së 17 majit të 2017-ës, Rama vrau dy zogj me të njëjtin gur – parandaloi bashkimin e partive kundërshtare në një koalicion të madh para zgjedhjeve, ndërkohë që mbolli idenë se do të krijohej një koalicion i madh PS-PD, pas zgjedhjeve.
Si rezultat i asaj marrëveshje atëherë, numri i pjesëmarrësve të djathtë në zgjedhje pësoi një rënie dramatike (nga 680 mijë më 2013, në 460 mijë më 2017), ndërkohë që përçarja e votave opozitare i mundësoi Ramës 74 mandate parlamentare, me vetëm 48% të votës popullore (nëse do të kishte qenë e bashkuar opozita atëherë, PS mund të merrte vetëm 70 mandate).
Sidoqoftë një armik i padukshëm po punon aktualisht kundër Ramës. Quhet Covid-19. Nga një sondazh telefonik që publikova në prill në emisionin Real Story të Sokol Ballës, rezultonte se 83% e shqiptarëve kishin besim tek institucionet qeveritare për mbrojtjen e popullsisë nga Covid-19 (ishte koha kur karantina e vendosur nga Rama ishte e plotë dhe mesatarja e rasteve të konfirmuara ditore vërtitej rreth 12-ës).
Ndërsa në një sondazh që zhvillova në shtator për një fondacion gjerman (në të gjithë territorin e vendit me intervista face-to-face), më rezultoi se vetëm 54% e shqiptarëve kanë disi ose shumë besim tek intitucionet qeveritare për menaxhimin e pandemisë Covid-19. Ky rezultat shënohej në sondazh, kur mesatarja e rasteve ditore te konfirmuara vërtitej rreth 120-ës.
Tani që mesatarja ditore e rasteve të konfirmuara ditore me COVID-19 vërtitet rreth 300-ës, mund të ketë rënë edhe më tej besimi i shqiptarëve tek intitucionet qeveritare, për menaxhimin e pandemisë Covid-19. Dhe me ardhjen e dimrit (kur shumë e shumë shqiptarë rrijnë kokë më kokë në ambjente të mbylluara klasash, auditoresh, kafenesh, restorantesh, zyrash etj. etj.) mund të pritet një rritje e ndjeshme e përhapjes së pandemisë dhe viktimave të saj. Gjë që mund të sjellë edhe rënien e mëtejshme të kuotave të besimit të publikut ndaj qeverisë Rama.
Atë që s’po ia bën dot opozita e përçarë Edi Ramës, ndoshta po ja bën nëndetsja Covid-19…
