Një shqiptar ka rënë në pranga në Britani për trafik droge javën e kaluar. Mediat britanike bëjnë me dije se shqiptari u tradhtua nga “çorapja” që mbante në makinë, ku kishte fshehur 10 g kokainë.
Mediat bëjnë me dije se emri i tij është Bledar Mahmutaj dhe ai u arrestua nga policia e Cardiffit. Gjatë momentit të ndalimit, shqiptari ka paraqitur një patentë fallco si shtetas grek. Por, patenta nuk i ka bindur autoritetet dhe ata kanë bërë një kontroll të makinës.
Gjatë kontrollit brenda makinës, ata kanë parë një çorape, të cilës fillimisht nuk i kanë kushtuar rëndësi. Por, në një moment të dytë gjatë kontrollit ata e kanë parë me kujdes çorapen dhe në brendësi të saj kanë gjetur kokainën e fshehur, të ndarë në 27 doza të vogla. Atij i janë kapur edhe 1000 paund.
23-vjeçari kishte një vit e gjysmë që kishte shkuar në Britaninë e Madhe dhe më konkretisht në Uells, por nuk kishte arritur të gjente punë pasi nuk kishte dokumenta.
Teksa gjykata e la në burg si masë sigurie, në seancën e kësaj të hëne ai kërkoi që të dërgohej në Shqipëri.
