Kryeministri i Italisë, Giuseppe Conte ka paralajmëruar Bashkimin Evropian për rrezikun e një dështimi të mundshëm, përballë krizës së koronavirusit.
Në një intervistë për BBC, Conte tha se nëse nuk miratohet një projekt shpejt, mund të jetë shumë vonë për Evropën.
“Nëse nuk e shfrytëzojmë këtë mundësi për t’i dhënë një frymë të re projektit evropian, rreziku për dështim është real. Drejtuesit evropianë kanë një takim me Historinë që nuk mund ta humbin”, tha ai.
Këto deklarata u bënë ndërkohë që ministrat evropianë të Financave nuk arritën të binin dakord, pas një nate të gjatë diskutimesh, për një përgjigje ekonomike të përbashkët përballë koronavirusit. Vendet e veriut, veçanërisht Holanda, mbeten kundër atyre të jugut.
Ndërkohë që Italia vijon të insistojë në krijimin e një instrumenti të borxhit të përbashkët, në formën e eurobondeve dhe dëshirojnë një përdorim të Mekanizmit Evropian të Stabilitetit (MES) pa kushte.
MES u krijua në vitin 2012 gjatë krizës së borxhit në zonën euro, për të ndihmuar shtetet që përballen me probleme të financimit në tregjet.
Por Berlini dhe Haga refuzojnë të angazhohen në një kredi të përbashkët me shtetet me shumë borxhe në jug.
