Italia ka firmosur dekretin e ri për lëvizjen e qytetarëve në situatën e krijuar nga shpërthimi i koronavirusit në vend.
Kryeministri italian, Giuseppe Conte mbajti sot një konference për shtyp në Pallatin Chigi duke njoftuar kështu masat e reja të lëvizjes.
Conte bëri me dije se masat aktuale kufizuese do të zgjasin deri më datë 3 maj.
“Masat kufizuese zgjaten deri më 3 maj. Ky është një vendim i vështirë por i domosdoshëm për të cilin unë marr përsipër të gjitha përgjegjësitë politike. Ne nuk mund të hedhim poshtë përpjekjet e bëra deri më tani. Do të rrezikonim të kishim rritje të numrit të viktimave”, shtoi ai.
Por pavarësisht këtij vendimi, libraritë, kancelaritë, dyqanet për fëmijë si dhe disa aktivitete të tjera prodhuese, siç janë rihapja e pylltarisë do të jenë të lejuara që nga 14 prilli.
Në ditët e fundit është shënuar një rënie e ndjeshme në numrin e viktimave në Itali. Por shteti fqinj vijon të jetë shteti me numrin më të madh të vdekjeve të shënuara nga COVID-19.
Ndërsa renditet e treta si vendi me numrin më të madh të personave të infektuar nga virusi vdekjeprurës.
Më shumë se 1,6 milionë njerëz nga e gjithë bota janë prekur nga koronavirusi, ndërsa mbi 101 mijë persona kanë humbur jetën.
