Situata epidemiologjike e Covid-19 po përkeqësohet nga dita në ditë në vendin tonë, pasi shifrat janë rritur në mënyrë të ndjeshme.
Sikur të mos mjaftonte kjo, edhe spitalet covid janë të tejmbushur, ndaj dhe shumë pacientë detyrohen të marrin shërbime në autoambulanca, në pritje të lirimit të shtretërve.
Për Presidentin e Republikës, Ilir Meta mungesa e një plani dhe strategjie konkrete, rrezikon që sistemi shëndetësor të zhytet në kolaps të thellë, me pasoja tepër të rënda për shëndetin e qytetarëve.
Sipas tij, në situatën aktuale, është tepër e domosdoshme të shtohet masivisht numri i testimeve.
Meta kërkon hartimin e një plani dhe koordinimi me sistemin privat, si dhe vënien në efiçencë të mjekut të familjes.
Kreu i Shtetit i bën thirrje qeverisë që të rimbursojë shpenzimet e pacientëve që mjekohen në shtëpitë e tyre.
Postimi i Presidentit Meta në rrjetin social, Facebook
Në mungesë të një plani dhe strategjie konkrete për të përballuar përhapjen masive të pandemisë COVID-19, të reflektuar me shtim çdo ditë të numrit të qytetarëve të infektuar, fatkeqësisht edhe të humbjeve në jetë, sistemi shëndetësor rrezikon të zhytet në kolaps të thellë, me pasoja tepër të rënda për shëndetin e qytetarëve.
Në këto kushte, është tepër e domosdoshme të shtohet masivisht numri i testimeve, si një mjet efikas për gjurmimin dhe trajtimin në kohë të qytetarëve të prekur nga COVID-19.
Për këtë qëllim të miratohet pa vonesë edhe një plan koordinimi i qartë dhe transparent me sistemin privat, për të bashkuar të gjitha energjitë dhe kapacitet e duhura.
Thelbësore gjithashtu është vënia në efiçencë të plotë të mjekut të familjes, shtimi i stafit mjekësor dhe atij mbështetës, si dhe planifikimi i buxhetit të duhur në ndihmë të tyre.
I bëj thirrje Qeverisë të bëjë çdo përpjekje për rimbursimin e plotë të shpenzimeve, veçanërisht të pacientëve që mjekohen në banesë, të familjeve me ndihmë ekonomike dhe të pensionistëve.
