Indeksi i çmimeve të prodhimit pësoi një rënie të fortë me 4.1% në tremujorin e dytë të vitit, duke ulur më shumë presionin për rritje të inflacionit në ekonomi.
Ky indeksi mat çmimet e produkteve vendase në hallkën e parë të tregtimit ose e thënë ndryshe çmimin me të cilin ato hidhen në treg nga prodhuesit. Ai është një tregues me vlerë orientuese për ecurinë e pritshme të çmimeve të konsumit.
Instat raporton se rënia e çmimeve të prodhimit në tremujorin e dytë u përcaktua sidomos nga industria nxjerrëse, me 32% më pak krahasuar me tremujorin e dytë të vitit të kaluar. Pandemia dha një goditje të fortë në çmimet e lëndëve të para në tregjet botërore, duke ndikuar rrjedhimisht edhe çmimet e shitjes së produkteve të industrisë nxjerrëse në Shqipëri. Ndërkohë, çmimet e industrisë përpunuese iu kthyen një rritje të lehtë me 0.2%, pas rënies me 1.5% në tremujorin e parë.
Një rritje e lehtë u regjistrua kryesisht në çmimet e industrisë së përpunimit të veshjeve dhe këpucëve, të destinuara kryesisht për eksport. Ndërkohë, dega më e rëndësishme, ajo e industrisë ushqimore, qëndroi në rënie me 0.6% më pak krahasuar me një vit më parë.
Nga ana tjetër, çmimet e importit regjistruan një rritje vjetore të lehtë me 0.4%. Ndryshe nga çmimet e prodhimit vendas, këtu si produktet e industrisë nxjerrëse, ashtu edhe të asaj përpunuese, shënuan një rritje të lehtë të çmimeve, me përkatësisht 1.3% dhe 0.9%.
Duket se ecuria e çmimeve të prodhimit dhe atyre të importit nuk paralajmërojnë një rritje të shpejtë të indeksit të çmimeve të konsumit në vend. Inflacioni regjistroi një rritje kalimtare në muajt e parë të pandemisë, i shkaktuar kryesisht nga rritja e çmimit të prodhimeve ushqimore dhe nga një mbiçmim afatshkurtër i euros në kursin e këmbimit me lekun. Por, pas rihapjes së ekonomisë inflacioni ra gradualisht në nivelin 1.4%, që ishte vlera mesatare e rritjes së çmimeve të konsumit për vitin e kaluar.
Banka e Shqipërisë pret që inflacioni të qëndrojë i ulët edhe gjatë vitit 2020 dhe parashikimi për kthimin e tij në objektiv është shtyrë për në vitin 2022./Monitor
