Ambasadorja e SHBA-ve në Shqipëri, Yuri Kim, u bëri sot thirrje institucioneve të reja të drejtësisë shqiptare që të ndërtojnë bashkëpunimin për të çuar përpara drejtësinë shqiptare.
“Ngritja e Zyrës Speciale të Prokurorisë dhe Byrosë Kombëtare të Hetimeve është një hap themelor dhe shumë i rëndësishëm drejt funksionimit të SPAK, për të zhvilluar hetimet kundër krimit të organizuar dhe korrupsionit. Si një anëtare e NATO-s dhe si kandidate për në BE, Shqipëria duhet të ndërtojë mbizotërimin e ligjit.
Kjo nuk është një zgjedhje, kjo është një kërkesë, e cila duhet plotësuar. I duhet dhënë fund korrupsionit dhe pandëshkueshmërisë; këto janë pengesat që Shqipëria të bëhet më e mirë dhe ai magneti që duhet të jetë për të tërhequr investime”, tha ambasadorja e SHBA-ve në Shqipëri, Yuri Kim.
Ajo i bëri këto komente në një konferencë mbi sfidat e prokurorit të përgjithshëm, në vazhdën e reformimit të sistemit gjyqësor.
“Ky është një vit i madh për rrugën e Shqipërisë drejt Bashkimit Europian, ndaj reformat e saj janë shumë të rëndësishme po edhe shumë të vështira. Reforma në drejtësi ka sjellë ndryshime në sistemin në prokurori, dhe është koha që të fitohet besimi i publikut dhe qëndrueshmëria”, tha ambasadorja amerikane, Kim.
Ajo siguroi prokurorinë për mbështetjen amerikane në rrugën e forcimit të ligjit, ndërsa kërkoi një goditje më të fort ndaj korrupsionit.
“Fajtori nuk duhet të shpëtojë, dhe i pafajshmi nuk duhet të vuajë. Mos lejoni që fajtorët të shpëtojnë dhe mos i lejoni që të pafajshmit të vuajnë”, tha ambasadorja e SHBA-ve në Shqipëri, Yuri Kim. /VOA
