Gjatë 24 orëve të fundit, mjaft shqetësuese janë shifrat që vijnë nga qyteti i Shkodrës lidhur me personat e infektuar me koronavirus. 12 raste të reja janë identifikuar vetëm në këtë qytet, pothuajse sa gjysma e rasteve totale.
Ministria e Shëndetësisë njoftoi se këto raste janë identifikuar në dy rrethe familjare. Mes të prekurve është edhe një fëmijë 13-vjeçar. Por çfarë ka ndodhur që ka kaq shumë të prekur? Pse ka kaq shumë persona të infektuar?
Sipas zv/ministres së Shëndetësisë, Mira Rakacolli, ky numër vjen si pasojë e mos respektimit të distancimit social.
“Kjo rritje e numrit të rasteve në Shkodër, tregon edhe njëherë mos respektimin e distancimit social dhe masave të kontrollit të infeksionit që Ministria e Shëndetësisë vijon të rekomandojë çdo ditë ne komunikimet publike”, tha ajo.
Në 24 orët e fundit janë testuar 112 persona të dyshuar, prej të cilëve janë konfirmuar 27 raste të reja me COVID-19. Deri në këto momente janë testuar 2031 raste të dyshuara, dhe prej tyre janë të konfirmuar pozitivë me COVID-19, 304 raste.
