Shkencëtarët kanë dalë në përfundimin se korriku i këtij viti, ishte i treti më i nxehtë në histori. Muaji i kaluar ishte një nga korrikët më të nxehtë në botë të regjistruar pas atij të vitit 2019 dhe 2016, me temperatura jashtëzakonisht të larta nga Finlanda në Shtetet e Bashkuara.
“Kur shikojmë temperaturat globale, ka ndryshime nga viti në vit apo edhe nga muaji në muaj”, tha Freja Vamborg, shkencëtare e lartë në Shërbimin e Ndryshimeve Klimatike të ‘Kopernikusit’ të Bashkimit Evropian.
“Por në fund të fundit, gjëja kryesore që ne shohim është një prirje e ngrohjes në nivel global, dhe në shumicën e rajoneve të botës”.
Rajone të shumta u përfshinë nga ngjarjet ekstreme të motit muajin e kaluar, në përputhje me konsensusin e shkencëtarëve se ngrohja globale po i bën valët e nxehtësisë më të mundshme dhe më të rënda dhe se një planet më i nxehtë do të çojë në reshje më të mëdha.
Nxehtësia rekord në Shtetet e Bashkuara dhe Kanada, e cila filloi në qershor, vrau qindra njerëz dhe ndezi zjarret. Në Kinë, Belgjikë dhe Gjermani, reshjet ekstreme shkaktuan përmbytje vdekjeprurëse. Veriu tropikal i Australisë regjistroi temperaturën më të lartë ditore maksimale muajin e kaluar, ndërsa temperaturat mbi Afrikën Veriore ishin më të larta se normale “pothuajse kudo”.
Disa rajone ishin pak më të ftohta se mesatarja, përfshirë Gjermaninë dhe pjesë të Rusisë.
Ralf Toumi, bashkëdrejtor i Institutit Grantham për ndryshimet klimatike në Imperial College London, tha se shpërthimet e fundit të nxehtësisë rekord nuk janë befasi, duke pasur parasysh modelin afatgjatë të rritjes së temperaturave.
“Kjo është një kazino konstante që ne po luajmë, dhe ne thjesht po zgjedhim numrat e lartë përsëri dhe përsëri”, tha ai.
Burimi i lajmit: Reuters. Përshtati: Tirana Today
