Nga: Lutfi Dervishi
Nuk ka ditë që të mos ndeshesh me tituj të tipit: “debat i ashpër/nxehtë/zjarrtë mbrëmë në studion e.. mes….” dhe kur lexon për “debatin” kupton që dy (apo më shumë) të ftuar në studio televizive kanë fyer apo janë kacafytur/kërleshir me njëri- tjetrin!
Fyerja nuk është debat, madje nuk është lajm me interes publik. Mund të jetë interesant për publikun, por jo interes publik.
Nëse lexon fjalorin e gjuhës shqipe është e qartë se çfarë është “debat”.
Debat: “Rrahje mendimesh ndërmjet dy a më shumë vetave rreth një çështjeje politike, shoqërore etj.; diskutim i gjerë, i hapur për një çështje me rëndësi. Debat i lirë. Debat i gjallë (i ashpër). Debat revolucionar. Debat politik (shoqëror, shkencor)”.
Një lutje për shkruesit e këtyre lajmeve tejet interesante, por jo me interes: mos e ndotni fjalën “debat”. Mund të jeni më të drejtpërdrejtë me tituj: për shembull: “u shanē me libër shtëpie; u sherrosën…; ulëritën ndaj njëri – tjetrit; folën të 4-t në të njëjtën kohë; folën si e ëma Zeqos në majë të thanës; nuk e mori vesh i pari të dytin; grinë dy orë sallatë; u zunë si gratë e liga; dy i ranë gozhdës, dy patkoit; u zunë për mustaqet e Çelos; ulëritën mē shumë se kur ra tërmeti; etj etj,
Ka plot fjalë e proverba shqipja për këto rastesh, ndaj për hir të Zotit mos e ndotni fjalën DEBAT!
