Ndërsa artistët dhe aktivistët vijojnë rezistencën e tyre për të mos u shembur Teatri Kombëtar, kryeministri Edi Rama ka publikuar mesazhin e regjisorit Altin Basha, i cili mbështet ndërtimin e një godine të re.
Përmes një postimi në rrjetin e tij social “Facebook”, Rama ka ndarë qëndrimin e Altin Bashës, në mesazhin e të cilit thuhet se ndërtesa aktuale nuk ofron mundësinë për zhvillimin e një krijimtarie cilësore teatrore.
Postimi i Ramës:
Regjizori Altin Basha, një ndër emrat më të spikatur të gjeneratës së re të krijuesve të skenës, mbështet njësoj si shumica dërrmuese e komunitetit teatror shqiptar, ndërtimin e Teatrit të Ri Kombëtar dhe shembjen e gërmadhës ekzistuese.
ALTIN BASHA:
Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët.
