Transporti i pacientëve që bëjnë hemodializë, është kthyer në makth. Më e vështirë është për ata që jetojnë në fshatra larg spitalit. Për të marrë shërbimin, këta pacientë u duhet që të lëvizin nga një mjet në tjetrin, dhe këto distanca kanë një kosto në buxhetin e tyre.
Xhevat Cullhaj nga fshati Stërbeg i Spillesë, kryen hemodializën tre herë në javë në spitalin e Durrësit. Ai për transportin rimbursohet nga shteti me 320 lekë në ditë, ndërkohë që shpenzon 800-1000 lekë në ditë, sa herë shkon në Durrës. Për 13 herë që duhet të paraqitet për të kryer dializën në Durrës, shpenzimi vetëm për transportin i shkon rreth 12.000 lekë në muaj. Marrë shkas nga kjo problematikë e tij por edhe e dy personave të tjerë me të njëjtën diagnozë nga e njëjta zonë, “Fundjavë Ndryshe” u ka dhuruar një automjet.
Drejtori Ekzekutiv i Fondacionit “Fundjavë Ndryshe”, Arbër Hajdari, ka shkuar vetë në zonë për t’i takuar e për t’i dorëzuar mjetin, aq shumë të dëshiruar prej tyre.
“Në Stërbeg, Spille Kavajë. Për të takuar Xhevatin, i cili 3 ditë në javë bën dializë në Durrës. Atij i duhet të zgjohet herët në mëngjes, tre ditë në javë për të udhëtuar me 3 mjete të ndryshme deri në Durrës. Disa ditë më parë pamë vuajtjet e Xhevatit dhe 2 personave të tjerë me të njëjtën diagnozë nga e njëjta zonë. Sot, i dhuruam një automjet që këto 3 njerëz ta kenë të lehtë të shkojnë për të bërë dializën. Veç ta shikonit gëzimin në sytë e tij”.
