Komisioneri për Zgjerimin, Oliver Varhelyi, ka përshëndetur akordin mesa partive politike, për të diskutuar ndryshimet e sistemit zgjedhor në Këshillin Politik. Gjithashtu ai ka theksuar që të votohet sa më shpejtë marrëveshja e 5 qershorit, pasi është kusht thelbësor për integrimin.
“Reforma zgjedhore në Shqipëri: Gjë e mirë që Këshilli Politik do të diskutojë ndryshimet e propozuara në sistemin zgjedhor. Gjithëpërfshirja është mënyra e duhur për çështjet elektorale. Marrëveshja vendimtare e 5 qershorit të ruhet dhe votohet shpejt në ligj, pasi adreson një kusht kryesor për bisedimet e pranimit në BE”, tha Varhelyi.
Këshilli Politik i krijuar për Reformën Zgjedhore, do të mblidhet sërish. Opozita thotë se është rënë dakord në marrëveshjen politike të 14 Janarit dhe atë të 5 Qershorit. PD-ja do të çojë në takim përveç dy përfaqësuesve zyrtarë edhe sekretarin e Përgjithshëm, Gazment Bardhin.
Pas dakortësisë mes mazhorancës dhe opozitës jashtëparlamentare, është vendosur që mbledhja të mbahet ditën e hënë, 20 korrik, në orën 11:00 në Pallatin e Kongreseve.
