Alfred Cako, botuesi dhe ideatori i teorive konspiracionale, ka treguar se kush është plani final me pandeminë. Në një intervistë të dhënë për gazetën “Fjala”, Cako hedh hipotezën se gjithçka është mirëmenduar me kohë, dhe është studiuar në të gjitha detajet. Në fund qëllimi final është zhdukja e shtresës së varfër.
Në analizën e tij, Cako citon se pandemia është më e keqe se një luftë, madje mund të konsiderohet ‘lufta e tretë botërore’. Ai nuk e ka lënë me kaq, por shprehet më tej se ata që do të mbeten gjallë, duke shpëtuar nga virusi vdekjeprurës, do të mikroçipohen.
“Kjo është një plandemi, nuk është një pandemi, e studiuar në të gjitha detajet që këta të arrijnë në përfundimin e tyre diabolik, disa dimensional që është në radhë të parë: heqja e shtresave të varfra të shoqërisë, pra zhdukja e tyre.
Kjo plandemi është më e keqe se një luftë, mund të quhet lufta e tretë botërore, do synohet që me disa procese njerëzimi të zbresë në një shkallë të madhe të përqindjes së vetë, në numrin e atyre që do të ngelen gjallë.
Ata që do të ngelen gjallë do të mikroçipohen, pra do të kalojnë atë që quhet epoka trans-humane ose periudha e dytë e humanoidit”.
Mendoni se do të arrihet ky qëllim i tyre?
“Unë mendoj që do të jetë një luftë e madhe, midis Zotit që ka krijuar njeriun dhe të gjitha speciet e tjera dhe djallit që lufton me mjetet e shkencës. Duke rënë në dorë të njerëzve psikopatë që e kontrollojnë atë nëpërmjet parave, shkenca po kthehet kundër njeriut.
Absolutisht, unë nuk jam kundër shkencës, sepse e di që shkenca e ka çuar njeriun në këto nivele të larta. Por kur shkenca bëhet armike e njeriut, atëherë është shumë e rrezikshme. Mendoj që këtë luftë do ta fitojë njeriu, nuk ka tiranë dhe diktatorë që ta ndalojë”.
