Byroja e Kuvendit ka përjashtur Edi Palokën me 10 ditë, pas hedhjes së bojës kundrejt Edi Ramës. Po kështu, një reagim është përcjellë edhe nga Garda e Republikës.
Në një deklaratë të shpërndarë për mediat, Garda thotë se lënda e hedhur në drejtim të kryeministrit është një solucion kimik i parapërgatitur. Garda njofton gjithashtu se ka nisur hetim penal për Palokën.
“Sot, në sallën e seancave të Kuvendit të Shqipërisë, deputeti Edi Paloka ka sulmuar me një solucion kimik të parapërgatitur Kryeministrin e Shqipërisë, z. Edi Rama.
Garda e Republikës me mbështetjen e strukturave të specializuara të Policisë së Shtetit ka nisur hetimet e menjëhershme për agresionin e kryer në sytë e të gjithëve, dhe gjithashtu procedimin penal kundër shtetasit Edi Paloka”, thuhet në njoftim.
