Oerd Bylykbashi, në një deklaratë për mediat pas takimit të Këshillit Politik, deklaroi se mazhoranca nuk e do konsensusin dhe nuk lejojnë verifikimin biometrik. Ndër të tjera zbuloi se sot kanë bërë një propozim të ri për Kolegjin Zgjedhor, duke kërkuar që të jetë Gjykata Kushtetuese ajo që do hetojë shkeljet në zgjedhje. Po kështu ai paralajmëroi se pa arritur konsensusin në këto çështje, nuk mund të vijohet më tej.
“Kemi folur për debatin e djeshëm, refuzimin e Partisë Socialiste për verfikimin biometrik për të gjithë votuesit, që bëhet me qëllim që të mos mbushen kutitë. Edhe sot e kanë refuzuar këtë pikë, dhe bëjnë të pamundur arritjen e konsensusit për çështje të tjera.
Ne sot bëmë një propozim për Kolegjit Zgjedhor, duke sugjeruar që të jetë Gjykata Kushtetuese, trupa e cila do shqyrtojë për zgjedhjet dhe shkeljet e tjera. Pa arritur konsensusin në këto çështje, nuk mund të vijohet më tej”, u shpreh ai.
