Ish-deputeti i Partisë Demokatike, Oerd Bylykbashi, pas takimit me mazhorancën tha se propozimet e PD janë themelore dhe nuk do lejojnë që zgjedhjet të zhvillohen pa gjykata të pavarura, ku qytetarët nuk kanë mundësi të ankimojnë. “Mazhoranca nuk e priti mirë propozimin e opozitës për moratorium për gjyqtarët e Kolegjit Zgjedhor”. Kështu u shpreh Bylykbashi, ku tha se në fund të tryezës politike për Reformën Zgjedhore, ka pasur përplasje dhe reagime të ashpra.
Bylykbashi nënvizoi ndër të tjera se kjo është thelbësore, në mënyrë që shqiptarët të kenë një gjykatë të paanshme, të pavarur dhe funksionale. “Sot opozita bëri propozimin e paketës tjetër në reformën, në përputhje me kalendarin.
Opozita ka propozuar 6 paketa, dhe në ditët në vijim do jetë edhe një tjetër për financimin e partive. Propozimi i sotëm ishte themelor, e drejta për t’iu drejtuar një gjykate të paanshme dhe të pavarur.
Raporti i OSBE/ODIHR konstaton se si nën presionin politik nga Vettingu, Gjykata e Posaçme ishte gjysmake, në periudhën zgjedhore, dhe nën presionin e Vettingut, e për rrjedhojë nuk ishte e paanshme dhe e pavarur.
Duke qenë se pa një garanci, procesi zgjedhor nuk mund të jetë kurrë i pavarur, kjo paketë është thelbësore për të arritur kompromisin në Reformën Zgjedhore. Pati reagim shumë të fortë nga mazhoranca, e cila do të vazhdojë të kontrollojë mekanizmat, me të cilat kapin gjyqësorin. Ne këtë nuk do ta lejojmë. Është një proces, që është thelbësisht problematik. Ju keni rastin e Dvoranit, që nuk justifikon 100 milionë lekë dhe askush nuk u kujtua ta ankimonte atë vendim të turpshëm dhe sot kemi këtë situatë”, tha Bylykbashi.
