Buxheti do të rishikohet sërish. Ministrja e Financave dhe Ekonomisë, Anila Denaj deklaroi gjatë mbledhjes online të Këshillit të Investimeve se qeveria është duke u përgatitur për një rishikim të dytë të buxhetit.
Në mbledhjen e Këshillit u diskutua situata e krijuar në vend për shkak të pandemisë COVID – 19, masave financiare dhe ekonomike që janë ndërmarrë deri tani nga qeveria për të përballuar pasojat, si dhe reformat që mund të sugjerohen për rimekëmbjen e ekonomisë.
Në fjalën e saj, ministrja Denaj bëri një pasqyrë të situatës së përgjithshme makroekonomike të Shqipërise, por edhe në kuadrin rajonal e ndërkombëtar.
Ministrja vlerësoi se në lidhje me Shqipërinë, nga parashikimet konsiderohet që ndikimi i dy fatkeqësive, ai i tërmetit në nëntorin e kaluar si dhe situata e pandemisë do të krijojnë ulje të konsiderueshme të PBB-së. Gjë për të cilin qeveria shqiptare është angazhuar, jo vetëm në periudhën e parë të këtij 6-mujori, por njëkohësisht parashikon një rishikim të dytë të buxhetit, ku si pasojë e reflektimit të uljes së të ardhurave të realizuara nga administrata tatimore dhe doganore tkurrja do të jetë më e madhe sesa parashikimi i bërë në muajin mars. Në kuadrin makrofiskal është parashikuar një rishikim i dytë i buxhetit, me ulje të PBB-së, midis nivelit -2 deri në -5%. Sigurisht, kjo do të jetë subjekt i diskutimeve në muajin korrik.
“E një rëndësie akoma më të veçantë është sesi do të ngrihemi në situatën post-covid, në atë çka ne quajmë ‘Plani i rimëkëmbjes’”, tha Ministrja Denaj. Sipas saj, në këtë kuadër Këshillit të Investimeve i është kërkuar që të mbështesë me marrjen e të gjitha propozimeve nga bizneset, që funksionojnë në sektorë të ndryshëm të ekonomisë shqiptare, në mënyrë që Plani i Rimëkëmbjes të përfshijë përpara prezantimit të tij dhe disa nga këto propozime”.
Gjatë këtij takimi virtual, Ministrja Denaj tha se, në raport me politikën fiskale, mbarëvajtja është parë në aspektin afatmesëm, në atë 5-vjeçar, i cili do të mbështetet nga modernizimi dhe automatizimi i proceseve, të cilat do të sjellin një centralizim të informacionit në kohë reale dhe përmirësim të administrimit fiskal të siguruar nëpërmjet disa proceseve:
-implementimit të fiskalizimit,
-shërbimit automatik të informacionit,
por edhe shumë produkteve të tjera që janë në diskutim për të realizuar një administrim sa më efektiv të të gjithë instrumenteve që Administrata Tatimore dhe Doganore menaxhon aktualisht.
Përsa i përket politikave të zhvillimit ekonomik, zonja Denaj tha se me rëndësi janë stimujt e zhvillimit të sipërmarrjes, jo vetëm fiskalë, por edhe ato të politikave të zhvillimit ekonomik me fokus SME-të.
Sipas Ministres, është propozuar që qasja politike e çdo sektori të shikohet jo vetëm në raport me projektet prioriotare, por edhe në raport me stimulimin e sipërmarrjes në sektorë të veçantë.
“Në këtë moment lind nevoja që digjitalizimi të mos përfshijë vetëm optimizimin e proceseve të qeverisë, që është sot fakt, por të konsiderojë edhe aspektin ekonomik për digjitalizimin e aktivitetit ekonomik në të gjithë sektorët. Vlera e shtuar e digjitalizimit ekonomik duhet të lidhet me rritjen e qasjes drejt investimeve të cilat do t’i quaja ‘investime smart’’ dhe që në fokus mund të kenë si përmirësimin e sistemeve software, por edhe investimeve aktive fikse që do të duhet të rrisin produktivitetin, cilësinë e produkteve ‘Made in Albania’”, u shpreh Ministrja.
Në këtë kuadër, Ministria e Financave dhe Ekonomisë ka propozuar dhe politika të cilat mund të nxisin në të ardhmen investime “smart” në kombinim të skemave jo vetëm të garancisë, por edhe granteve.
Gjithashtu Ministrja Denaj vlerësoi politikat e punësimit, si një qasje proaktive në dy aspekte:
1-për të risjellë në tregun e punës atë pjesë, e cila gjatë periudhës së tre muajve të fundit u ballafaqua me humbjen e një marrëdhënie kontraktuale pune
2- për të nxitur një punësim sa më shpejt në nivelin e kohës afat shkurtër, por edhe afat mesëm, politikat stimuluese dhe incentivat do të nxisnin një marrëdhënie biznes-qeveri në një format që sigurontë një punësim sa më të gjatë në kohë.
Me shumë rëndësi Ministrja vlerësoi formalizimin e tregut të punës me një skemë të re që do të mundësonte uljen e informalitetit.
Gjatë diskutimeve anëtarët e Këshillit të Investimeve kanë bërë rekomandimet dhe sugjerimet, përshirë edhe ngritjen e një grupi pune teknik për të hartuar strategjinë kombëtare të rimëkëmbjes.
Me specifikisht, KI ka rekomanduar:
a) Ndërtimin e një pakete konkrete për tërheqjen e Investimeve të Huaja Direkte, veçanërisht në ato zona që kanë potencial njerëzor dhe mungojnë vendet e punës, listë transparente me objekte industriale që nuk janë privatizuar ende, koordinim me disporën dhe transparencë për planet e investimeve publike, përshpejtim i zgjidhjeve të problemeve që lidhen me pronësinë etj..
b)Kuadër ligjor dhe reformë fiskale – fokus konsolidim i reformës drejtesi, politika fiskale që nxisin konkurueshmërinë, politika aktive të tërheqjes së IHD-ve, shoqëruar me marketing, konsolidim i pronës, si edhe transparencë mbi koncensionet aktuale etj..
c)Stimulim i konkurueshmërisë së produkteve (produkte industriale dhe bujqësore) “Made in Albania”, duke maksimizuar potencialin ndoshta nga delokalizimi i kompanive globale thjeshtëzim dhe stabilizim i kuadrit fiskal në funksion të konkureshmërisë) fuqia punëtore etj..
d) Strategji afatgjate informaliteti dhe stimulim për mbështetjen e bizneseve qe të drejtohen në bursë.
Në nivel sektorial, u rekomanduan veprime prioritare konkrete në afatshkurtër për mbështetjen e sektorit të Agropërpunimit, Turizmit dhe IT dhe Inovacionit.
Ministrja Denaj informoi pjesëmarrësit edhe mbi nismën e qeverisë për hartimin e një plani të zgjeruar të Rimëkëmbjes Ekonomike, që do të konsultohet edhe me biznesin. /Monitor
